Ditefiso tsa Sekolo le ho Lokollwa Boikarabelong ba Ditefiso

Ditefiso tsa sekolo ka tjhelete ya tumellano eo batswadi ba e lefang dikolo, ka sepheo sa ho ntlafatsa boleng ba thuto ya baithuti. Ditefiso tsa sekolo di ke ke tsa kenyeletsa ditefiso tsa ngodiso, botsamaisi le ditefiso tse ding. Sekolo se ke ke sa lefisa ditefiso tse eketsehileng bakeng sa dithuto (subjects).

Ho ya ka SAASA di-SGB kaofela dikolong tsa mmuso di tlameha ho tlatsetsa tjheleteng ya tshehetso ya mmuso, ka ho lefa ditefiso tsa sekolo e tse ding le ho etsa dintho tse utlwahalang tsa ho bokella matlole a dithuso. Tokelo ya ho se lefise ditefiso tsa sekolo e tla lekanyetswa feela dikolong tse boletsweng e le tse se nang ditefiso tsa sekolo. Mabitso a dikolo tse sa lefisang ditefiso tsa sekolo a tla hatiswa ho Gazette ya Provinse mme mekgwatlhahlobo ya ho bona hore na dikolo ke dife tse sa lefiseng ditefiso o tla itshetleha ka maemo a ekonomi ya batho ba potolohileng sekolo.

Letlole la sekolo ke motswako wa ditefiso tsa sekolo, ho bokella ditjhelete tsa dithuso le menyehelo. Ke boikarabelo ba di-SGB ho etsa bonnete ba hore matlole ana kaofela a bolokwa le ho tsamaiswa akhaonteng e le nngwe ya banka. Ha ho sekolo sa mmuso se tlamehang hore se be le akhaonte ya banka e fetang e le nngwe.

Sekolo sa mmuso se na le tokelo ya ho nka mehato ya molao kgahlanong le motswadi ya sa lefeng ditefiso tsa sekolo, empa feela ka hore mekgwatlhahlobo ya ho lokollwa boikarabelong ba ditefiso e ile ya sebediswa mme motswadi o ntse a ikarabella ho lefa ditefiso tsena. Moithuti o tlameha ho ba sekolong nakong eo nyewe e ntseng e tswela pele.

Moithuti a ke ke a behellwa thoko mananeong afe kapa afe a semmuso a sekolo ka lebaka la ho patalwa ha ditefiso tsa motswadi. Sekolo se ke ke sa boloka rapoto ya moithuti ka hobane motswadi a sa kgone ho lefella ditefiso tsa sekolo.

Ho Lokollwa Boikarabelong ba ho Lefa Ditefiso tsa Sekolo

Ho lokollwa boikarabelong ba ho lefa ditefiso tsa sekolo ke tsela eo mmuso o thusang batswadi ho fihlella thuto ya boleng bo botle bakeng sa bana ba bona, ho sa natswe hore ba holetse hokae kapa dithibelo tsa bona tsa ditjhelete. Ho lokollwa boikarabelong ba ditefiso ho lokela ho balwa ho tloha tshimolohong ya selemo, haeba batswadi ba tshwaneleha.

Batswadi ba hlolehang ho lefa ditefiso tsa sekolo ba tlameha ho etsa kopo ho SGB bakeng sa tokollo e sa fellang kapa e feletseng boikarabelong ba ditefiso tsa sekolo. Diforomo tsa kopo di ka fumana ho SGB ka ho sebedisa hlooho ya sekolo. Dikolo tsa mmuso di tlameha ho tsebisa batswadi ka mekgwatlhahlobo ena le mekgwatshebetso le ho ba thusa ho etsa kopo ya ho lokollwa ditefisong tsa sekolo. SGB e tlameha ho bolella mokopi sephetho sa kopo ya hae nakong ya matsatsi a 7 kamora ho lekola tokollo e ka fanwang mabapi le boikarabelo ba ditefello tsa ditefiso.

Dikolo ha di a lokela ho lefisa ditefiso tsa sekolo bakeng sa bana ba dikgutsana.

Haeba motswadi a sa kgotsofatswa ke qeto ya SGB e amanang le ho lokollwa ka karolo e itseng kapa ho lokollwa ka ho feletseng boikarabelong ba ditefiso, motswadi eo a ka etsa boipiletso ho Hlooho ya Lefapha (Head of Department) kgahlanong le qeto eo sekolo se e entseng nakong ya matsatsi a 30 kamora ho fumana qeto ya sekolo. Ke boikarabelo ba sekolo se seng le se seng sa mmuso ho thusa batswadi ho hlahlela boipiletso ba bona.

Menyehelo ka Boithaopo

Motswadi ofe kapa ofe, ho kenyeletswa le ba fuweng tokollo boikarabelong ba ditefiso, ka boithaopo a ka nyehela ka boithaopo letloleng la sekolo. Dinyehelo tsena di ka ba sebopehong a tjhelete, ka ho fana ka ditshebeletso dife kapa dife tseo motswadi a ka fanang ka tsona sekolong.

Thuso bakeng sa Batswadi ba Etsang Kopo ya ho Lokollwa Boikarabelong ba Ditefiso tsa Sekolo

Sekolo ka seng sa mmuso se kgothaletswa ho theha Komiti ya Ditefiso tsa Sekolo. Modulasetulo wa komiti ena e tlameha ho ba setho sa SGB. Mosebetsi wa komiti ena ke ho tsamaisa ditaba kaofela tse amanang le ditefiso tsa sekolo tse kang ho bokellwa ha ditefiso tsa sekolo, ho tlalehela SGB ka lekeno la ditefiso tsa sekolo le ho thusa batswadi ho etsa dikopo tsa ho lokollwa boikarabelong ba ditefiso tsa sekolo. Komiti ena e sheba dikopo tsa ho lokollwa boikarabelong ba ditefiso le ho neha SGB dikgothaletso tsa yona.

Motswadi eo, ka mabaka afe kapa afe, a hlokang thuso mabapi le ho etsa kopo ya ho lokollwa boikarabelong ba ditefiso tsa sekolo kapa ya hlahlelang boipiletso, a ka kopa modulasetulo wa komiti ya ditefiso tsa sekolo kapa ditho dife kapa dife tsa Komiti ya Ditefiso tsa Sekolo (School Fees Committee) ho mo thusa ho etsa kopo ena.

Haeba ho se thusa e fuwa motswadi kamora ho etsa kopo e jwalo, hlooho ya sekolo e amehang e tlameha ho thusa motswadi ka kopo e jwalo kapa boipiletso haeba hlooho ya sekolo e kopjwa ke motswadi ho etsa jwalo. Ha ho kopo e tla behellwa thoko jwalo ka e sa tshwaneleheng ka hobane foromo ya kopo ya motswadi e sa tlatswa ka ho feletseng kapa e sa tlatswa ka nepo. Komiti ya Ditefiso ya Sekolo e tlameha ho fana ka karabo ya yona ka lengolo ho batswadi mabapile sephetho sa kopo ya bona nakong ya matsatsi a 14 kamora ho fumana kopo.

Boipiletso bakeng sa Dikopo tse Hannweng tsa ho Lokollwa Boikarabelong ba Ditefiso

Motswadi eo kopo ya hae e hannweng ke SGB o na le tokelo ya ho hlahlela boipiletso ba hao ho Hlooho ya Lefapha wa provinse nakong y a matsatsi a 30 kamora tsebiso ya qeto e nkuweng. Hlooho ya sekolo kapa Komiti ya Sekolo ya Ditefiso e tlameha ho neha motswadi monyetla le thuso ka ho fana ka foromo ya boipiletso ho motswadi le ho e hlalosa.

Motswadi ya etsang boipiletso o tlameha ho neha Head of Department dintho tsena:

Mabaka a ho etsa boipiletso le tlhahisoleseding kaofela e manang le boipiletso.
Hlooho ya Lefapha o tla kopa modulasetulo wa SGB ho mo romella ona nakong ya matsatsi a 14:

Khopi ya dintlha tsa seboka seo e SGB e ileng ya buisana ka yona Le maikutlo afe kapa afe ao SGB e lakatsang ho fana ka ona mabapi le kopo Le tlhahisoleseding efe kapa efe e amanang le boipiletso.

Hlooho ya Lefapha (Head of Department) o Tla:

Nakong ya matsatsi a 14 kamora ho fumana ditokomane tse tswang ho motswadi ho tsebisa modulasetulo wa SGB ka boipiletso bo hlahletsweng ho tsebisa SGB hore e ke ke ya nka mehato kgahlanong le motswadi ho fihlela boipiletso bo mamelwa nakong ya matsatsi a qeto mabapi le boipiletso, ho tsebisa SGB le motho ya entseng boipiletso ka lengolo mabapi le qeto le mabaka a yona.